«آيريليق»
نازلي يار عشق اودونا بيرده آليشديم
يئنه جانان لا كوسوب قم له باريشديم
بيرده او دورنا گؤزون گؤرمگينه جانلا چاليشديم
يئنه ده قان لا قاريشديم
يئنه كؤنلوم نه اولوبدور توتولوبسان
هانسي ليلا ساياغا مجنون اولوبسان ، وورولوبسان
ندي دردين نيه بس قانلا دولوبسان؟
يار تك ، سنده اورك ، آتما مني
بير خومارگؤز مارالين قايغي سينا ساتما مني
سنده جانان كيمي آلداتما مني
قم ايله ، ماتم ايله قاتما مني
يئتر آغلاتما مني .
نه اولار سنده بيرآز مهر و محبت گؤره سن؟
ديل بيلن يارين اولا ، شوق ايله نازين چكه سن؟
يار سنين يارين اولا ، او قارا زولفون هؤره سن؟
بو قدر آغلاماييب بير گوله سن؟
دونن آخشام يئنه گئتديم گؤرم او نازلي ياري
وعده وئرميشدي گله بيرده باري
نئجه اود ووردو منه او گؤروشون اينتيظاري
گلمه يين گئتمه يه قاتدي دلي كؤنلوم نيگاري
بيرده باخدي اوزومه ايسته دي گئتسين
دؤزمه دي سؤزلريمي كاميل ائشيتسين
نه اولوردو او منيم حاليمي بيلسين.
بير قدم گوتدو چاغيرديم:
نه اولور گئتمييه سن
مني ترك ائتميه سن
دؤندو باخديم اوزونه
دوشدو يالوارماغا ديل، آغلاماغا گؤز
گئتمه بير دؤز
سنه يالوارميرام، آمما
بونو يالوارماق حئسابلا
اوخ اولوب باغريما باتما
مني آتما.
دؤندو تحقير ايله باخدي
قم اوخون قلبيمه تاخدي
كؤنلومو اودلادي ياخدي
دئدي:آخير نه دئييم باشقا ياريم وار
سنه من سؤز وئره بيلمم، اؤزومون سؤز وئرنيم وار
نه يامان وئردي جواب او سؤزومه
بير زامان چيخديم اؤزومدن ، يئنه گلديم اؤزومه
اوندا بيلديم كي گئديبدير او گوزل ياريم اليمدن
نئجه اينصاف ائلدي او آييران جاني تنيمدن
ايكي ال بير باشيم اولدو
ائله بيل يوز ياشيم اولدو
بوغازيم توتدو قهر، باتدي سسيم
ائله بيل كي كسيليردي نفسيم.
اودا باخماقلا منه گؤزلري دولدو
ساراليب هئيوا كيمي ، گول كيمي سولدو.
آغلاديق هر ايكيميز ياش توكنينجه
بو صداقتلي سئوينجه
گؤزو آغلار سسي سيزلارديله گلدي
سانكي بي دين ، دينه گلدي
دئدي ، سن هر نه دئميشدينسه اينانديم
سني مجنون كيمي سانديم
سني يانديرماغا يانديم
چوخ اوتانديم،
من سنين عشقينه لاييق دئييلم
بيه مندن سورا گؤز قاره سي يوخدور،
آيريليق دير يولوموز
چاره سي يوخدور.
بو سؤزايله گئدرك آتدي مني
قم ايله ، نيسگيل ايله قاتدي مني
آخ نئجه آغلاتدي مني.
بيرده اود توتدو يانان سيگاريلا جان
ياندي قلبيم اودونا ، توستوسونه عشق بوغولدو
وئرديگيم قول شرف سيندي اوغولدو
گلدي يورغون سره لندي
گؤزلريندن ياش الندي.
توتدو اوز تانريا ، قيشقيردي باغيردي:
هئچ كيمين سئوگيسيني باشقاسينا يار ائله مه
مني بوندان دا بؤيوك درده گرفتار ائله مه.
آغلاماقدان دا يورولدو
سيلدي گؤز ياشلاريني سوسدو بوغولدو
آچدي قم دفتريني قان ايله يازدي:
مني هئچ كيمسه اينانماز
سؤزومو درديمي قانماز
دوشر عاشيق اودا البت
هئچ كيم آنجاق ، بئله يانماز.
بابك اسدي
داغداغان